بھٹکل23؍جولائی (ایس او نیوز)مرڈیشور پولیس اسٹیشن میں درج شکایت کے مطابق ہریش مادیو نائک پر الزام لگایا گیا ہے کہ وہ ایک نابالغ لڑکی کے ساتھ مسلسل چھیڑ چھاڑکرتے ہوئے اسے اپنے ساتھ شادی پر اکسانے کی کوشش کررہا ہے اور لڑکی کی ماں پر بھی اس کی شادی کروانے پر دباؤ بنانے لگا ہے۔

ہریش پر یہ بھی الزام ہے کہ اس نے مزید پیش قدمی کرتے ہوئے 21جولائی کی شام کو جب وہ لڑکی کالج سے لوٹتے ہوئے موڈشیرالی میں بس سے اتری تو ہریش بائک پر سوار ہوکر وہاں پہنچا اور اس کا راستہ روک کر پھر سے شادی کرنے کی مانگ کی۔جب اس لڑکی نے شادی سے صاف انکار کیا تو مبینہ طور پر ہریش نے اس کی کنپٹی پر طمانچہ مارااور اسے جان سے مارنے کی دھمکی دی۔جب لڑکی کی چیخ سن کر آس پاس کے لوگ جمع ہوئے تو ہریش لڑکی کو چھوڑ کر وہاں سے فرار ہوگیا۔

مرڈیشور پولیس نے معاملہ درج کرنے کے بعد تحقیقات شروع کردی ہے۔